Menú

FeSP-UGT Ensino demanda á Administración vontade negociadora na reunión da mesa sectorial para a homologación salarial

Nova reunión da Mesa Sectorial de Ensino para a Homologación Salarial e novo fracaso. A Administración segue ancorada nunhas cifras e nuns prazos, inaceptables para FeSP-UGT e o resto das organizacións sindicais. O próximo día 1 de xuño volverán reunirse e UGT urxe á Administración a “revisar a súa proposta e propor algún movemento máis aceptable que deixe de manifesto a súa vontade negociadora”.

Na reunión de hoxe, FeSP-UGT propuxo un cambio na súa proposta á Administración coa intención de conseguir unha apertura de diálogo na mesa Sectorial Docente desta mañá: Unha suba salarial de 125 euros repartidos en dous anos. O aboamento do 50% no mes de xullo de 2018  e o outro 50% durante o 2019.

Pola súa parte, a Administración modifica a súa proposta inicial e ofrece un incremento de 15 euros sobre a súa proposta inicial: Un total de 65 euros repartidos en 20 euros con efectividade de xaneiro de 2019, 20 euros efectivos en xaneiro de 2020 e un último aboamento de 25 euros en xaneiro de 2021. Esta proposta a FeSP-UGT parécelle insuficiente e inaceptable tanto pola contía como polos prazos de execución.

Como resumo da Mesa Sectorial de hoxe, podemos dicir que CIG mantén a súa proposta de 150 euros e un calendario de negociacións. CCOO prantexa unha baixada de 15 euros quedando a súa proposta en 115 euros, baixada coincidente coa suba que posteriormente propón a Consellería. ANPE propón unha baixada a 125 euros manifestando que non hai moito máis marxe de redución da contía.

A posición da FeSP-UGT é clara e manifesta a súa vontade negociadora, pero non a calquera prezo. Demandamos á Administración unha imperiosa necesidade de revisión do calendario de aplicación para poder chegar a algún tipo de acordo e propoñemos 125 euros; cantidade a percibir en dous anos (50% en cun primeiro aboamento en xullo de 2018 e o outro 50% no ano 2019); mantendo as premisas dunha suba mensual e lineal para todo o profesorado galego; coa necesidade de que o acordo contemple unha cláusula de revisión (finais do 2019).

É inaceptable establecer como data de finalización da aplicación do acordo o ano 2021 e esiximos unha aplicación inmediata que axude a restituír a precariedade salarial que o profesorado ven sufrindo desde hai dez anos e manifestamos o noso absoluto rexeitamento á proposta da administración de 65 euros mensuais que nos seguiría deixando á cola do resto de CCAA situándonos nun noveno posto. 

 

 

SÍGUENOS EN FACEBOOK


ÚLTIMOS TWEETS

      

      

IR ARRIBA